LETTRES DU S. DE BALZAC

A MONSIEUR DU PLESSIS

Monsieur,

Puisqu'il semble que vous vouliez perdre à toutes les heures ce que vous ne sçauriez perdre qu'une seule fois, & que vous faictes aussi peu d'estat de vostre vie que si elle estoit à un autre, je treuve que la guerre vous a traité favorablement de s'estre contentée d'une partie de vostre visage, & que vous avez gaigné tout ce qui vous est demeuré de reste. Monsieur du Mayne, & les autres n'en ont pas esté quittes à si bon marché,& Dieu en a voulu faire des exemples, afin qu'il ne semblast pas approuver la vanité, ny avoir besoin du vice des hommes pour la deffense de sa cause, & de son Eglise. Véritable­ment quand ils eussent eu intelligence avec les ennemis, ils ne s'y pouvoient pas fier davantage, ny aller plus nuds à la guerre, s'ils eussent eu à combattre contre des femmes. Aussi tant s'en faut que je loue leur desespoir, que je ne leur pardonne pas mesme leur mort, & si j'eusse esté creu, on leur eut fait leur procez, comme à des gens qui se sont tuez eux-mesmes, &qui ont commis le plus grand de tous les parricides. Il me sieroit mal en cet endroit de faire des leçons à mon maistre, & si j'entreprenois de prescrire à vostre courage jusques où il

doit aller, ce seroit vouloir donner des bornes à une chose infinie. Toutesfois trouvez bon que je vous face souvenir que la vaillance est une vertu si tendre & si délicate, que si les autres ne la couvrent quelque-fois, & ne la conservent, ell' est plus dommageable à celuy qui l'a, qu'elle n'est utile au bien de l'Estat, & au service du Prince : Et certes sans la raison qui luy doit servir de maistresse, & la prudence de guide, il n'y a point de passion plus aveugle, ny qui diffère moins de la fureur des bestes, & de l'impétuosité des Barbares. Ceux-cy croyent que ce soit lascheté de fuïr quand une rivière se desborde, ou de n'attendre pas la cheute d'une maison qui s'en va par terre. Mais eux & nous n'avons pas la mesme fin, & comme ils se proposent sans plus de tuer & de mourir, aussi nous devons songer à vaincre, & négliger tout le reste. Autrement que nous scrviroit-il de connoistre la vertu, & les extremitez qui la bornent, & d'estre nais sous un Ciel plus heureux que celuy de Pologne & de Moscovie, si nous ne tirions aucun advantage, ny de la bonté de nostre institution, ny de celle de nostre naissance? Je ne m'es tonne point qu'il y ayt des gens qui préfèrent la mort à la pauvreté, & qui ne treuvant point de contentement en eux-mesmes, sont bien ayses de sortir par îà de la glace de leur païs, & de la misère de leur fortune : Mais un honneste homme, qui à toutes les heures du jour reçoit des plaisirs tres-parfaicts &tres-innocens, & qui a une grande partie de la vertu de son siècle à perdre, est traistre au public, & ennemy de soy-mesme, s'il quitte tout cela de bon cœur, & s'il en prive le monde pour un peu de bruit, & de vaine gloire. Vous

le sçavez, Monsieur, beaucoup mieux que moy : & si vous jugez que la Philosophie, que vous avez autrefois tant estimée, soit encore assez sage pour vous conseiller, elle vous dira que la vie est le fondement de tous les autres biens, avec lequel on peut recouvrer des Royaumes perdus, & demeurer le maistre après la perte de quatre batailles. Il n'y a point de doute qu'un Lyon mort ne vaille moins qu'un chien qui se porte bien, & que la plu­part des Roys dont on parle, & des Capitaines dont les histoires sont pleines, ne voulussent avoir changé leur réputation pour nostre vie. Et partant, Monsieur, resjoùis-sez-vous avec toute la nature, de ce que vous estes encore au nombre des hommes, & consolez-vous avec Hannibal & le père d'Alexandre, de la perte que vous avez faicte. Quoy que vous puissiez dire, il vous reste assez de veuë pour devenir amoureux, & pour considérer les beautez du Ciel, & de la terre. Et quand vous seriez tout à faict aveugle, n'est-il pas vray que la nuict a ses plaisirs aussi bien que le jour, & que ce sont ceux que vous aymez davantage.

Le 15. Décembre 1622.

__________

Notes

Du Plessis avait perdu un œil au siège de Montpellier. Plusieurs des relations contemporaines mentionnent le fait, entre autres les Mémoires de Bassompierre. « Le dimanche 2 octobre une monsquetade crevé un œil au sergent de bauille nommé Le Plessis. »